歐聯八強抽籤 皇馬大戰祖記 爆發英超內訌

歐聯八強抽籤皇馬大戰祖記爆發英超內訌

即上英超刨績王:http://win.on.cc/epl 

歐聯八強抽籤剛剛完成,衞冕皇家馬德里,將大戰祖雲達斯爭奪四強位置,重演上屆決賽戲碼;巴塞則抽得好籤,遇上八強中較弱嘅羅馬。英超雙雄曼城及利物浦,就冤家路窄抽中硬撼,換句話說肯定有一支英超球隊殺入四強。

大會搵嚟AC米蘭名宿舒夫真高負責抽籤,皇馬鬥祖雲達斯成為最矚目戲碼。雖然於西甲表現一般,但爭取歐聯三連霸嘅皇馬,於歐戰保持水準,16強淘汰本屆奪標大熱之一嘅巴黎聖日耳門,球隊於歐聯全力衝刺,冇人敢睇小皇馬奪標機會。祖雲達斯近年於歐聯表現出色,對上三屆兩次殺入決賽,但最後分別輸畀西甲巴塞及皇馬,同冠軍獎盃擦身而過,今次能否復仇?堅好睇過戲。相較於皇馬,巴塞對較易應付嘅羅馬,以巴塞及美斯今季巔峰狀態,羅馬勢難做攔路虎。

另一勁旅拜仁慕尼黑,則鬥西甲另一雄獅西維爾。西維爾於16強清脆淘汰曼聯,於分組賽又同利物浦鬥得激烈,實力不容忽視。不過拜仁於軒歷基斯帶領之下,戰鬥力有增無減,入四強機會絕對可睇高一線。

最後一個四強席位,由英超兩支勁旅曼城同利物浦爭奪。雙方今季兩度交鋒,曼城於首循環大數紅軍5:0,但次循環利物浦贏番場4:3,暫時成為本季英超,唯一一隊擊敗藍月亮嘅球隊,呢次再次硬撼,相信又有入球騷睇!

八強兩回合將於四月舉行,決賽將於5月26號深夜喺基輔舉行。

歐聯八強抽籤剛剛舉行,結果如下:
巴塞隆拿(西班牙) Vs 羅馬(意大利)
西維爾(西班牙) Vs 拜仁慕尼黑(德國)
祖雲達斯(意大利) Vs 皇家馬德里(西班牙)
利物浦(英格蘭) Vs 曼城(英格蘭)
(前者首回合主場出戰)

東網體育FB同你追實體壇每個精彩時刻!
http://bit.ly/2ecTF2A 


本文來源:http://hk.on.cc/hk/bkn/cnt/sport/20180316/bkn-20180316191405502-0316_00882_001.html

index-icon