【香港正宗片皮鴨】孝敬爸媽之選 金公館抵食傳統京川滬風味

【香港正宗片皮鴨】孝敬爸媽之選 金公館抵食傳統京川滬風味

片皮鴨可以話係我同屋企人最鍾意嘅中菜,但係喺香港想搵正宗片皮鴨其實都唔係咁容易㗎,工作太忙好耐都無食過了,難得放幾日假抖抖,疫情期間又真係好少出去食飯,就諗住請爸媽去食吓好嘢,老人家都真係要孝敬吓㗎!

話說原本想book位請佢哋食西餐,但係諗起兩老可能唔太習慣,所以都係搵返中菜啦,阿爸鍾意食川菜,爬過吓文,見到網上好多人介紹一間將軍澳嘅中菜館 - 金公館,見佢網上評價都幾多like,特色係由正宗四川師傅主理,仲要有我哋一家大愛嘅片皮鴨添,香港要搵正宗而且性價比高嘅片皮鴨都唔易㗎,於是就去試試啦!

今次揀去調景嶺彩明商場裡面嘅金公館分店,就喺地鐵站附近,超易搵啊!門口位置已經見到好多片皮鴨宣傳,睇黎真係黎到必點嘅菜式!餐廳環境光猛而且都乾淨企理,阿媽最怕碗碟唔乾淨,佢要求咁高,都話幾好啊!

今次由阿媽話事,決定叫個4人餐,裡面有泡椒鳳爪、豬肺湯、片皮鴨、酸菜魚、口水雞、擔擔麵一共6道菜,再加支紅酒就perfect喇!

泡椒鳳爪

我本身鍾意食微辣,呢個泡椒鳳爪酸酸辣辣非常開胃,而且鳳爪唔會太硬,脆口得黎好入味,like!

 泡椒鳳爪

青城山杏汁白肺湯

阿媽至欣賞杏汁白肺湯,一見到就即刻話要叫,因為清理豬肺步驟好多,屋企整太麻煩,所以有就一定要飲喇!呢個湯每盅都非常足料,奶白色湯水一打開已經聞到超濃郁,豬肺乾淨,而且瘦肉同雞腳煲嘅湯底好夠肉香味,加埋肥厚白菜,非常清潤!

青城山杏汁白肺湯

片皮鴨

期待已久,終於黎到主角片皮鴨喇!香港嘅片皮鴨雖然多選擇,但係要食到味道正宗嘅就唔係間間有,試過之後,呢度嘅片皮鴨喺香港真係數一數二啊,個人覺得回頭率超高!!

片皮鴨新鮮出爐熱辣辣,擺法整齊,而且見到啲皮色好紅潤油亮,師傅原來仲會好細心咁片走中間層脂肪,食落就唔會滿口油脂,食多幾舊都唔怕喇!以前食過一啲片皮鴨片到好薄無肉食,呢款一層皮一層肉咁係我至愛啊!饃饃皮新鮮蒸好又熱又軟,加埋口感酥脆嘅鴨皮同嫩滑鵝肉,真心正!香港都有好食片皮鴨喇!

片皮鴨 
片皮鴨

酸菜魚

份量十足超大盆嘅酸菜魚,用四川老壇酸菜煮開,加埋滑溜魚肉,味道好香濃又唔會太辣太嗆!裡面仲有萵筍同水晶粉,集合好多不同口感!

酸菜魚

招牌口水雞 

呢個真係有驚喜!雞肉熟得恰到好處,唔會太硬,皮肉都非常嫩滑。紅油唔算太辣,加埋蔥花、芝麻同花生碎,非常醒胃!

招牌口水雞

四川擔擔麵

食到呢度其實我已經好飽,不過呢個擔擔麵都好唔錯,麵條順滑,吸收咗好多湯汁,但唔會糊口,加上花生香味,正!飲埋個紅酒真係飲飽食醉喇!

四川擔擔麵 

整體黎講,今次全家都一致好評啊!睇過介紹,呢間嘅京川滬菜由當地師傅主理,所以味道好正宗,可以再戰!

(來稿)

index-icon